Venite, exultemus,

cantemus, iubilemus;

invenimus hac die mulierem fortem

hoc mortale abiiciens velum;

summum hodie scandit coelum.

Canunt angeli laetantes,

celebrantes eius sortem.

Multae filiae congregaverunt divitias,

haec supergressa est universas;

dives haec misericordiae,

dives fidei et castitatis.

Prodit ante thronum gloriae,

muneribus onusta pietatis.

Fallax gratia

et vana est pulchritudo;

mulier timens Deum

ipsa laudabitur.

Hanc aemulamini, filiae;

psallentes, hanc collaudamini, dicentes:

«Haec vera gratia quae nunquam deficit,

haec pulchritudo quae nunquam labitur».

Mulier sancta, mulier fortis,

quae aeterna vita gaudes;

dum cantamus tibi laudes,

precibus frange

nostrae vincla mortis.

O decus sanctarum,

o flos viduarum,

o astrum coeleste;

defende nos a bello,

a fame, a peste.